KAPELLET I FATLANDSKOGEN
Det kvite kapellet på GULLHAUG legg ein ekstra dimensjon til dette flotte og populære anlegget.
Bryllaup, barnedåp, navnefest, gravferd, fødselsdagar, konsertar, dei fleste typar jubileum og arrangement kan gjera seg nytte av det vesle kapellet, som om sommaren er utstyrt med både piano og kyrkjeorgel.
Spesialitet: Gullbryllaup på Gullhaug.
30.08.2024
Skogen bakom skapar ei naturleg og fin ramme for eit kapell som dette. Juli 2023.
Dette er det publikum ser, frå utsida og inn gjennom den store veggluka. Frå ein liten konsert i august 2024, då Bryne-russen frå 1967 var på besøk. Foto Atle Helland.
EIT SPESIELT KAPELL
Det som særleg skil dette kapellet frå andre kapell er at det har ei stor luke i veggen. Denne kan skuvast til side, slik at publikum ute kan følgja med på det som skjer inne.
I eit bryllaup til dømes, kan alle sjå presten, organisten og brureparet, og følgja med på heile seremonien. Under ein orgelkonsert ser publikum organisten under heile konserten.
Ved dårleg vêr kan me organisera tak over gjestene, og vegger som le for vinden.
24.09.2024
GULLBRYLLAUP PÅ GULLHAUG?
Gjennom sommaren kan du leiga kapellet til dine eigne arrangement. Mange slags seremoniar kan du ha i kapellet, men gullbryllaup er altså spesialiteten vår.
Den 10. mars 2023 arrangerte me vårt første gullbryllaup her, og det var kjempesuksess, seier alle som var til stades. Klikk på knappen under for å sjå korleis det gjekk for seg. Der kan du òg lesa om korleis du sjølv kan laga ditt eige vesle høgtidelege arrangement i/ved kapellet.
24.09.2024
Det første gullbryllaupet i kapellet var høgtideleg og flott. Foto: Atle Helland.
KVA MED DÅP ELLER NAVNEFEST?
Dåp er ei kyrkjeleg handling som høyrer heime i ei gudsteneste. Sjølve dåpshandlinga kan derfor ikkje utførast i kapellet vårt. Eid kyrkje er nærmaste staden for barnedåp.
Slik er iallfall reglane per i dag. Men det hender at me har friluftsgudsteneste i/ved kapellet vårt, og då er det kanskje råd å ha barnedåp i samband med den. Diskuter gjerne dette med kyrkjekontoret.
Men selskapet som du skal ha for gjestene dine etterpå, kan gjerne vera på GULLHAUG. Då kan du eventuelt laga din eigen seremoni der kapellet er i bruk.
Navnefest er ikkje ei kyrkjeleg handling, men ei handling etter opplegg frå Human-Etisk Forbund. Her kan du la heile handlinga gå føre seg på GULLHAUG, gjerne med utgangspunkt i kapellet. Krossen på taket kan lett demonterast, og andre kristne symbol kan fjernast, om du ønskjer det.
24.09.2024
Det er plass til 8-10 gjester inne, eller minst 100 ute.
LEIGE AV KAPELLET
Viss du vurderer å leiga kapellet til eitt av dine eigne arrangement, finn du nødvendig info under menypunktet UTLEIGE.
30.08.2024
TRENG DU FOTOGRAF?
Har du ikkje eigen fotograf, bør du leiga ein profesjonell. Då er Atle det perfekte valet, han bur berre 20 minutt unna GULLHAUG.
Det er han som har skapt alle dei flotte bilda i galleriet om gullbryllaupet (knappen ovanfor). Dei er henta frå albumet som han laga om dette spesielle arrangementet. Eit slikt album lagar han gjerne til deg òg.
Atle er ingen kven-som-helst. Han er ein av eliten her i landet innan fotografi. Også internasjonalt har han gjort store ting.
Og så må det nemnast at han både i 2022 og 2023 vart norgesmeister i bogeskyting, med heiderleg plassering også i VM.
Kanskje kan du få han til å stilla opp som Amor i bryllaupet ditt? For å skyta piler?
08.01.2024
GALLERI
Desse bilda viser kapellet og litt av korleis me forsøksvis har brukt det så langt. Men alternative opplegg finst i fleng, når berre området rundt kapellet er ferdig opparbeidd og fullt utstyrt. Ver merksam på at kapellet er ikkje vigsla, så ein står relativt fritt i korleis ein vil bruka det.
09.01.2024
Den lange kvite hekken av bjørkebladspirea fører bort til kapellet, som ligg godt synleg frå porten, og med vakkert utsyn vestover fjorden. Juni 2023.
Kapellet er omkransa av blomar, som står i blom heile sommaren. Juni 2023.
Hagen rundt kapellet lagar ei fin ramme for mange typar arrangement. August 2022.
Vindauga er spesiallaga i Trondheim, med blomstermotiv. Mars 2023.
Når kapellet står ope, som her i påska, er det alltid gjester innom. Musikkinstrumenta frå heile verda imponerer. Mars 2024. Foto Kristian Hus.
Bordet kan brukast som alter, eller til andre aktuelle føremål. Mars 2023.
Organist Torvald Gjerde øver på kyrkjeorgelet, som han sjølv har finansiert. August 2022.
Orgelkonsert i august 2022, i altfor sterk varme, men likevel var det ganske bra frammøte.
