KONSEPTET VÅRT: GARDSBUTIKK, HAGERESTAURANT, SELSKAPSLOKALE, GULLBRYLLAUP, KONSERTARENA, TURGRUPPEMÅL
Dette er konseptet som me gjerne vil komma i mål med ein vakker dag:
GULLHAUG er eit hageområde på rundt 8 dekar, med høgt gjerde rundt, mest for å halda hjorten ute. Hagen er ei ramme som skal gjera det triveleg og innbydande å komma hit. Les meir ...
GULLHAUG er ein framifrå arena for friluftskonsertar, med inntil 250 tilhøyrarar. Sommaren 2022 hadde me to konsertar, sommaren 2023 fem konsertar, det same i 2024, med publikum som var godt nøgde. Les meir ...
På GULLHAUG skal me ha eigen gardsbutikk, der me sel produkt som er laga på garden, eller av andre i lokalmiljøet. Gardsbutikken vil alltid vera open når det skjer noko på GULLHAUG, og når hagen elles måtte vera open for publikum. Les meir ...
Om sommaren skal me ha hagerestaurant, med faste opningstider. Det blir servert lokale rettar, der mange av råvarene er dyrka på GULLHAUG eller andre stader i lokalområdet. Ureist, kortreist og til ein viss grad økologisk. Les meir ...
GULLHAUG er òg eit utandørs selskapslokale, der ein kan feira gullbryllaup (!), bryllaup, fødselsdagar, dåp, jubileum, og andre arrangement med inntil ca 80 gjester under tak. Les meir ...
GULLHAUG har eige kapell, med digitalt piano, keyboard eller orgel. Kapellet kan vera basis for bryllaup, gullbryllaup, konsertar, og mykje anna. Les meir ...
Og sist, men ikkje minst, er GULLHAUG eit fantastisk mål for turgrupper som kjem med buss. Kanskje 3-4-timars stans på turen, der du får med seg NATURSTIEN og GULLHAUG, inkludert matservering, underhaldning, og dessutan litt sjølvaktivisering, som det blir høve til. Full pakke, med andre ord. Les meir ...
Det er fleire arenaer på GULLHAUG, som kan brukast til ulike føremål. Les meir ...
18.03.2025
Frå terrassen på GULLHAUG har du 360-graders view, eller kanskje heller 360-graders wow, med utsikt over halve Sunnhordland. Skriv gjerne i gjesteboka som ligg her. August 2022. Foto: Vibeke Teigen.
GULLHAUG ER FRAMLEIS UNDER ARBEID
På grunn av eit vanskeleg byråkrati gav me, på sjølvaste nyttårsaftan 31.12.2022, opp arbeidet med å få prosjektet GULLHAUG ferdig. Me har kjempa så lenge, utan å møta kommunal velvilje, at me grunneigarane, Anna og Arne, orka ikkje meir. Om du er spesielt interessert i bakgrunnen, kan du lesa litt meir lengst nede på sida.
Men mange har bede oss prøva på nytt, så me gjer eit siste forsøk nå i 2025. For det vil vera altfor gale om alle pengane og timane skulle vera heilt til fånyttes, og at det området som er opparbeidd berre får gro til att.
Følg gjerne med her på nettsida og sjå kva det endar opp med. Klikk her om du vil sjå ein modell av korleis me tenkjer.
Innhaldet på denne heimesida baserer seg elles på det prosjektet me hadde planlagt, og som me altså framleis håpar kan bli ein realitet. Noko av det kan bli klart til sommaren 2025.
Bladet Grenda har på slutten av kvart år ei kåring der folket bestemmer kven som er Årets namn i Kvinnherad. For 2024 blei det faktisk oss, Anna og Arne, på grunn av arbeidet vårt med FATLANDSKOGEN. Les reportasjen i Grenda her (betalingsmur).
Dette viser at folket står ved sida vår, noko som gir oss eit visst håp om at dette kan me kanskje få til likevel. Kommunen må vel då sjå at det er ikkje berre oss dei kjempar mot, men folket sitt.
18.03.2025
Anna og Arne dreg på åra. Her i midten av julestjerna på topen av Gullhaug, med Såto i bakgrunnen. Foto: Vibeke Teigen.
Desse to fargerike fuglane, som er ei gåve frå tusenkunstnar Kjell Musland, møter deg allereie i porten.
KOM GJERNE OPP OG SJÅ
Når det ikkje skjer noko spesielt her, er det normalt fritt fram for alle enkeltpersonar og familiar å gå opp til GULLHAUG, heilt gratis, for å sjå på utsikta, og for å eta nista si. Og ikkje minst for å sjå om det skulle skje noko. Iallfall inntil vidare er det slik. Skriv gjerne nokre ord i gjesteboka.
Finn ut om det skjer noko nett i dag, ved å klikka her.
Større grupper (over 10 personar) må ha løyve dersom dei vil slå seg til her. Du må då rekna med å betala 500,- i leige (Vipps 72 44 33), men det avheng av føremålet med besøket. Ta kontakt med Anna (99 24 25 36) eller Arne (938 17 200) viss du er i tvil.
GULLHAUG er eitt av turmåla i den såkalla Fjelltoppjakten. Skaff deg poeng ved å gå ofte her. Finn ut meir på nettsida deira.
19.12.2024
BIDRAGSYTARAR
GULLHAUG er eit prosjekt som grunneigar Anna og Arne Gjerde står hundre prosent bakom. Det er på vår eigedom (gnr 206 bnr 1), og sidan dette skal bli ein del av næringsgrunnlaget på garden, er det ikkje naturleg å invitera til dugnad. Det er altså våre pengar og vår arbeidskraft som er basis.
Likevel må Øyvind Gjærde nemnast spesielt. God nabo, pensjonist, med god gravemaskin. Han har gjort mykje dugnadsarbeid på prosjektet, kort og godt fordi han elskar GULLHAUG. Her voks han opp, og han har mange gode minne herifrå. Tusen takk, Øyvind, for at du er med og fører barndomsminna våre eit steg vidare!
Me to gamle (73 og 77 år i 2025) er ikkje spesialistar i alt, og me har heller ikkje store musklar lenger. Følgjeleg har me leigd inn nokre gode folk som me gjerne vil takka for at GULLHAUG byrjar så smått å nærma seg den utforminga det er tenkt å ha.
Dei viktigaste av desse "muskelmennene" er: Kjell Musland, Arne Ragnar Johnsen, Øystein Thormodsæter, Stig Johannessen, Eirik Landa.
18.03.2025
Under reisinga av kapellet. Frå venstre Kjell, Arne Ragnar og Øyvind.
Arne sitt forslag til nytt kommunevåpen for Kvinnherad. Nytt slagord seier seg vel derfor kanskje sjølv?
BYRÅKRATIET STÅR I VEGEN FOR OSS
I 2021 gjekk heile året med, før kommunen omsider let oss ta i bruk vårt eige vassbasseng på 3000 m3, som er heilt nødvendig for å vatna den store hagen.
I 2022 gjekk òg året med, fordi kommunen ikkje vil la oss få bruka avløpssystemet som me eig, og som 44 andre tomter på Fatland har lov å bruka. Men altså ikkje me som eig det! Me kan sjølvsagt ikkje driva GULLHAUG utan toalett og avløp. Inntil vidare har me sett opp eit festivaltoalett, som er ei elendig løysing eigentleg.
Og i 2023 og 2024 har det heller ikkje skjedd noko som helst, trass i utspel mot ordførar og kommunedirektør, som begge uttrykkjer stor velvilje. Men så langt utan synleg resultat.
Me to eigarane, Anna og Arne, er altfor gamle nå, og helsetilstanden tilseier at me må prioritera annleis den delen av livet me har att. Fleire millionar kroner, pluss mange tusen arbeidstimar, må me langt på veg sjå som bortkasta. Så me får byrja å tenkja litt meir på oss sjølve.
Det er viktig å leggja til at lokalpolitikarane i hovudsak har vore svært positive til GULLHAUG. Det er krefter i byråkratiet som driv og sparkar bein på oss.
Og byråkratane sit tydelegvis med makta i Kvinnherad. Dei har til og med nekta oss finansiering i Innovasjon Norge! Utan pengar får me naturleg nok gjort lite.
20.12.2024
PS. Elles har Arne i mai 2024 begynt med ein blogg, som du kan sjå her. Noko må han finna på når byråkratane hindrar han i å bruka tida si på prosjektet.
PS2. I desse dagar vurderer me å selja heile eigedommen vår, inkludert GULLHAUG. Me trur at det gjerne er lettare for nye folk å komma i mål med prosjektet. Er dette noko for deg, trur du? Ta i så fall kontakt.
PS3. Kommunen har skriftleg gitt oss melding om at det er ikkje lov å ha toalett på ein landbrukseigedom!!! Kor mange lovbrytarar finst det då rundt om på gardane i dette landet? Svaret kan du senda til byggesakskontoret i Kvinnherad kommune.